Войналöн чужöм

Лудов Лёва рытсянь тэчис аскерöм чемодан. А одзлань — мечтаэз, планнэз, — да мый только эз пелитчы том юрö. Лöсьöтчис мунны гортö. Думайтiс, что гожумнас шоччисяс, отсалас мамыслö, а арнас направленнё сьöртiмунас уджавны заводö.

Асывнас чеччис одз. Шондiюгöррезöн малалiс тöв бöрын ловзьöм му. Быдлаын путриктiс — быдмис, читкылясис няр зелень. Руын павьялiс чöскыт, коддзöтан дук. Лун талун лоас мича, шоныт, зонкалöн сьöлöм вылын вöлiдолыт. Сiя пуксис трамвай вылö и мунiс кöрттуй вокзалö.

Вокзалын сiя казялiс: öтмöдöрö котрасисö отир, кин горöтлiс, кин горзiс и быдлаын кылiс сьöд юöр «война».

Отир чукöртчöм станция площадь вылö, а вылiсянь, вокзал крыша вывсянь, дребезжитiс репродуктор, юöртiс война пондöтчöм йылiсь.

Эта юöрсянь Лудовлö син одзын бытьтö шондiыс кусiс, сылö некодя¹лоис и думаэз дзугсисö: «Мый керны? Кольччыны городö. Гортö мунны?». Сiя татöн, городын, оз ни сулав военкоматас учёт вылын, гортын сувтас, а сэсся — фронт вылö. Сэтшöм команда сетiс аслыс зонка.

Но не сiдз шогмö, кыдз думайтан. Неделя мымда шоччисис, отсалiс мамыслö вочны карчйöр да мунiс уджавны заводö направленнё сьöртi.

Мунiкас мамыс кольлалiс ипатовскöй амбаррез дынöдз, чышкис чышьян пельöссэзнас синваэзсö и велöтiс зонсö: «Эн вунöт, Лёва, — тэ менам юрвердiсь. Тэ бöрсянь эшö куим няньсёйись, нiйö лэбтыны колö. Асьтö берегит. Быд местаö-осьтаö юртö эн сюйышт». Мамыс эшö эз вежöрт, что чожа кад сибалас, и зоныс мунас война вылö.

Перыта шагнялiс зонка тöдса Кульюрамыс вылöт, юдинскöй туй кузя, кöда Краснöй Яр деревня бердын петiс ыджыт тракт вылö. Эта туйыс Лёвалö учöтсянь тöдса. Кöркö бабыскöт эта туй кузя ветлiсö деревняэзö дöраэз вежны нянь вылö, а сыбöрын, кöр велöтчис городын, унаись этö туйсö талис-меряйтiс.

Луныс вöлiгажа, шондiёрис синнэз, но сы сьöлöм вылын пукалiс сьöкыт из. Кыдз думайтыштас мамыс йылiсь, кöда медбöрья кадö кельдöтiс, рушмис, зонка синнэзiсь сiдз и быгыльтчасö кортöм синваэз. Касьтывлiс и Марья Гавриловнаöс. Кытöн ни пö тэ, Горадзулюшко? Мый керан, кыдз олан, мича ныв? Кулитiс, видiс асьсö, что эз куж кольлавны ассис сьöлöмшöрсö. Этна думаэзöн петiс ыджыт тракт вылö, пуксис шоччисьны, и сэтöн вöтiс городскöй машина.

Лёваöс радöн панталiсö заводын. Сувтöтiсö стажируйтчыны бур мастер дынö. Завод тыртiс обороннöй заказ. Рабöчöйез, унажык инькаэз да подростоккез, уджалiсö усьтöдз лун и ой. Кыдз вермисö, кыдз кужисö, отсалiсö фронтлö.

Мöдiк годö Лудовöс босьтiсö армияö. Квать месяц велöтчис пулемётно-миномётнöй училищеын. Велöтiсö миномётнöй расчётлöн командирö. Но училище эз кончит. Виль год бöрын, бимороз лунö, училищеись курсанттэз духовöй оркестр музыкаöн пуксисö теплушкаэзö и мунiсö воюйтны.

Неделя бöртi, вильöсь эшö, адззывтöм, мый сэтшöм война, курсанттэз, öнiбоеццез ни, Москва увтын неыджыт станцияын гыж киссисö вагоннэзiсь. Эстöн том боеццез шатласисö кык сутки, кывзiсö, кыдз кытöнкö повзьöтлiс артиллерия, ойнас кымöрсö ньылiсö прожекторрез, вылын небоын бизгис «фокке-вульф», или, кыдз боеццез шуисö немецлiсь самолёт-разведчик, рама.

Куимöт лунö станцияö сувтiс пустöй эшелон теплушкаэзöн да платформаэзöн. Сетiсö команда пуксьыны поезд вылö. Пöрисьжык боеццез, кöдна мунiсö öтлаын курсанттэзкöт, баитiсö — эшелон пö мунö Юго-Западнöй фронт вылö. И быдса месяц эшелон кыссис конечнöй станцияöдз. Эстöн, эшелонын, Лёва пондöтчис вöлись тöдсасьны война чужöмкöт да сы философиякöт.

Эшелонын мунiсö уна боеццез, кöдна не öтiк бойын вöлöмась, и мукöдыслöн мороссэз выланыс югьялiсö не öтiк наградаöн ни. Нiя висьтасисö, кыдз чулöтiсö бойез, кыдз охотниккез, мукöдпырся содтiсö, мый эз вöв, ошшасисö, а бойезын вöвтöм боеццез осьта öммезöн кывзiсö нылiсь гарддьöм. Лудов эстöн тöдсасис боецкöт, кöда сылöн лоис бур фронтовöй ёртöн.

Лев Толстой нима станцияын, кытöн сулалiс кык сутки эшелон, ойнас отчаяннöй боеццез ештöмась ветлыны селеннёэзö и вайöмась сьöраныс бурак, кыдз татöн шусьö свёклаыс, турнепс, огуреццез, нельки судзöтöмась самогон.

Лудов пукалiс вагон угöлын, эстöн эз вöв печкасянь жар и уголь дук, кывзiс боеццезлiсь тарзьöм, ошшасьöм, кыдз тöдсасисö селоэзын местнöй нывкаэзкöт. Лёва дынö сибöтчис боец, нюжöтiс кисö солдатскöй кружкаöн и гажöна горöтчис:

— Ю, кунак. Эн тöждiсь: или юр кусттэз увтын, или морос — орденнэза иконостас.

Лёва видзöтiс сералiсь чужöма боец вылö, кружка вылö и юалiс: - Кöч йöв?

— Кытшöм кöч йöв? Не кöч йöв... бурак йöв. Кöр гöститöтöны, озö юасьö.

— Тэнат, сержант, доброыт кружка омöн ¹киссьö...

— Ми, казаххез, быдöнным добрöйöсь. Добро керö виль добро — этö быд казах вежöртö, — сылöн баитiкас дугаöн лэбисö, лэдзчисисö сьöд, тшöк гöна синкыммез.

Лёва сы киись босьтiс кружка, вайöтiс öм одзас, нырсö патшкыртiс нёштöм дук. Эта вотöдз зонка эшö эз тöд вина кöр и бöр кружкасö тойыштiс казах киö.

— Эн артась, ю. Фашистыс юр кузят кожгас, и этö он ешты пешлыны, — горöтчис ваксьöмöн казак.

Лёва, кыдз бытьтö настоящöй винагаг, перыта босьтiс кружка зонка киись, пöрöтiс гыркас самогон, курччöвтiс огурец и дыр кашляйтiс да несйис. Чожа гыркыс пондiс сотчыны, юрыс пондiс потны-висьны, и горшас кайис курыт комок. Котöртiс ыбöс дынö, и мый пöрöтiс гыркас, ковкнитiс-лэдзис бöр.

— Веж öмугöв... торкин добросö. Тэись оз пет бур солдат, — изгиляйтчис солдат.

Сiдз Лёва тöдсасис Нурсултан Разамбаевкöт. Казах, мыгöрнас неыджыт, но топыт, синнэзыс и юрсиыс чим сьöдöсь, коккез вылас боёк, отчаяннöй зонка. Сы морос вылын югьялiсö кык медаль — «За отвагу» да «За боевые заслуги».

Ашынас майор званнёын эшелонлöн начальник ветлöтiс доль эшелон кузя и мымда вын ряксiс, тшöктiс петны строевöй подготовка вылö. Том боеццез, сьöкыт похмельесянь гудыра синаöсь, гыжьясьöмöн лэдзчисö наррез вылiсь. А пöрись, бывалöй боеццез, кыдз кужисö — видiсö начальниксö: «Тыловöй тэ крыса, кынöмсö польдöтöм солдат карччез вылын, мöдöтчöм, кыдз свадьба вылö: виль ременнеза, свиттялан дзуртан сапога. Шедлан öтпыр передовöй вылö, кушмöм курöг кодь лоан. Да сэтшöм офицеррезыс передовöй вылö оз и мунö. Тшöктö ать-два керны, а сутки ни няньöн оз верд. Чавканнэзöн да дудiэзöн тшöктö вердсьыны». И быль, быд теплушка öшынiсь лэбзис чавкан да дудiгöн, кайесö боеццез лэдзисö автоматтэзiсь лыйöмöн кыдззез да тополлез вылiсь.

Том боеццез, кöдна эшö эз нюкайтö порох тшын, дасвит мымдаöн öксисö перрон вылö. Начальник нёштöма видзöтiс ны кельдöтöм чужöммез вылö, нестроевöй мыгöррез вылö и сьöкыта горöтчис: «Геройез... Мать твою, — чульс сьöвзис боеццезлань и эшö горöнжыка рякöстiс, — марш вагоннэзö, воякаэз! Позорниккез!»

Эшелон локтiс Валуйки станцияö. Эстöн боеццез босьтiсö нянь, консерваэз, сахар да табак. Ны сьöлöм вылын лоис гажажык.

Лудов дынö Сибöтчис Нурсултан, кыскис кармансис трофейнöй сигаретаэз и нюжöтiс зонкалö. Лудов откажитчис, ог пö курит. Пуксис Лёва бокö, вожмöтiс коккесö, пуктiс кисö сы пельпон вылö и горöтчис:

— Кунак, давай баитчам. Кытöн чужин-быдмин, величайтöны кыдз?

Лудов эз ешты сетны казах вопроссэз вылö ответ, кинкö лёк горшöн горöтiс: «Воздух!», ― и эта коста жö кымöрсö поткöтiс бомбаэзлöн усялöм шы, взрывнöй волнасянь пондiсö качайтчыны вагоннэз. Боеццез гыж киссисö вагоннэзiсь. Кин котöртiс, кин сапкисис гöпö, канаваö, дзебисö юррезнысö. А бомбаэз сё усялiсö, резiсö-паздiсö станцияись строеннёэз, жугдiсö кöрттуй. Кыдз казявтöг пондöтчис бомбёжка, сiдз жö чожа немецкöй бомбардировщикез бертiсö асланыс аэродроммез вылö.

Эшелон вылö бомбаэз эзö усьö, сiя кольччис дзонь, а вот кöрттуйсö жугдiсö.

Боеццез бертiсö вагоннэзö. Эшелонiсь начальник проверяйтiс вагоннэз и юасис öтiкö — раненöйез, вийöмöсь эмöсь?

Да, эшелонын вöлiсö вийöмöсь и раненöйез. Вот сiдз, солдаттэз эшö эзö локтö фронт вылö, а юррезнысö пуктiсö ни. Локтас гортö бумажка, кытчö гижасö геройскöя пö пуктöм юрсö Родина понда.

Куим лун бöртiВалуйкисянь эшелон пырис Купянскö. Вот и Украина. Украиналöн городок панталiс гажа шондiа лунöн. Февральскöй лым шондiвылын орсiс бриллианттэзöн. Городок кажитчис совсем не фронтовöйöн: мича, рам и чочком. Лёва понда Украина вöлiтöдтöмöн, но сiя тöдiс: эстöн аслас стиххезын сьылöтiс Украинасö сылöн великöй зон Тарас Шевченко, Николай Гоголь дивуйтiс отирсö «Диканька нима хутор дын рыттэзöн», кытöнкö татöн, Украина пельöсокын, быдмис Ларко Малиновский, спецпереселенец, Лёвалöн челядься ёрт. Лудов вöлiгордöй, что сiя пондас мездöтны фашисттэзсянь славнöй Украина.

Купянскын формируйтчис виль воинскöй часть — гвардейскöй дивизия, кöда сыбöрын лоас эшö и Краснознамённöйöн Суворов нима ордена дивизияöн.

Лудовöс сувтöтiсö миномётнöй расчётö наводчикöн, заряжающöйöн — не öтiк бой ни чулöтлöм Денисовöс, и минаэз ваялiсьöн - Коля Дунаевöс.

Миномётнöй взводöн, кытöн вöлiи расчёт Лудовлöн, командуйтны сувтöтiсö Нагибинöс. Нурсултан Разамбаев лоис взводнöй командирлöн помощникöн. Командирыс чужанiннас Алтайскöй крайись, война вотöдз уджалöм курöг фабрикаын директорöн.

Дженыт курссэз кончитöм бöрын сетöмась мортлö званнё «младшöй лейтенант», а вöлöм сылö сэк сорок годся унажык ни! Медодзза бойез примитöм Москва увтын, ранитöм, сiдзкö, сылöн боевöй опыт вöлiни. Но боевöй офицер вылö сiя некыдз эз вачкись: шинель сы вылын пукалiс, кыдз мöс вылын седло, ременьсö новйис личыта, коскас туйö сюйыштны не öтiк чер, лядьбейыс кузя вартö пистолет, а юр вылас шапка пыр пуктöм бокöн. Но сiя кужис баитны боеццезкöт, ны понда тöждiсис, заботитчис, бойез коста нiйö берегитiс. Кöр колiс, вöлiи строгöйöн, боеццезлiсь весь юрресö эз малав. Мукöдпырся видiс нiйö, кöр весь, пользатöг, мыччалiсö геройство. Кыдзкö и Лудовлö шедiс: «Боец, тэ мый сулалан, кыдз парад вылын? Вежöрт, дубина, тэныт виль юр некин оз сет, нельки Иисус Христос. Осьта öма герой».

Солдат Денисов вöлiКурган увтiсь. Дед-прадеддэзсянь нянь быдтiсь. Морт неыджыт, топыт, му бердсянь тэчöм, не уна баитiсь, но, кыдз шусьö, быд кыв сылöн ― золото, вес вылын öшлöм. Удж пора оз суетитчы, весись кинас оз вöрзьöт, не оз оськöвт, быдöс дзик сылöн лыддьöм. Шоччисик коста писис кыскас конверт, сэтчинiсь иньыслiсь да зоныслiсь фото, видзöтас-видзöтас ны вылö, мыйкö шушкыштас ныр увтас, гладьöтас карточкасö и бöр сюйыштас пиас. Лудовлö гленитчис вына, вежöра Денисов. И желайтiс сылö, медбы гортö бертiс ловья и дзонь. Лёва кыдзкö юалiс сылiсь: «Денисов, тэ войнаись он пов? Тэ пуляэсö, кыдз гуттэз, вашöтан...» Денисов дыр шы эз сет, сыбöрын серöмтчис и тэрмасьтöг видзис ответ: «Пола. Меным гортын уна удж эшö колö керны. Зонöс быдтыны, виль керку сувтöтны...».

А Дунаев вöлiнач мöдкодь. Кизерик, кöсперк, нервнöй морток. Шинель сы вылын öшалiс, кыдз майöг вылын. Война вотöдз сiя велöтчöм музыкантö. Кöр велöтчисö училищеын, пыр норасис: то сылöн кынöмыс висьö, то юрыс бергалö, то синнэс пемдöны, но санчастьын некытшöм шогöт сылiсь эз адззö. Дунаев öддьöн полiс войнаись, кошшис, кыдз бы не шедны фронт вылö. Училищеись курсанттэз сы вылын сералiсö, изгаляйтчисö:

— Эй, Дунаев, талун кынöмыт оз вись? И санчастьö он мун? Посылка пö карчöн тэныт эм.

Дунаев курсанттэзлiсь чушкан кыввез лэдзис пеллез бокöттяс, бытьтö не сыкöт баитöны.

Купянскын чулалiс не öтiк лун ни. Эшелоннэз боевöй техникаöн и личнöй составöн локтiсö и локтiсö. Сё эшö мунiс часттезлöн формированнё. Эта кадö солдаттэз тöдсасисö öтамöдныскöт.

Кыдзкö Лудов, Дунаев да Денисов пукалiсö керку посöдз поступеннез вылын, кытöн квартируйтiс нылöн расчёт, ны дынö сибöтчис казах Нурсултан.

— Здорово, кунаккез!

— Здорово, ёрт! — горöтчисö солдаттэз.

— Кытiсь чужанiннат, кунак? — казах бöра пондiс юасьны Лудовлiсь.

— Ме Уралiсь. Коми округись.

— Дак тэ комик?

— Не комик, а коми-пермяк, Пермскöй коми.

— Пермь йылiсь кывлi. Кама вылын город.

— Дак вот, ме сэтчинiсь.

— Сэк ме тэнö пермякöн понда шуны.

— Кöть кашникöн шу, лишь бы горö эн сюйышт.

— А кыдз тэнат фамиллёыт, нимыт?

— Тэ мый, сержант, следователь? Керан допрос? — лэбисö синкыммес Лудовлöн вывланьö, лöгöн свиркнитiсö синнэс.

— Эн лöгась, кунак, — ми, казаххез, сiдз тöдсасям. Эта басни бöрын, кöда кöркö эз шогмы бомбёжка кузя, Нурсултан часто вовлiс Лудов расчётö. Чужис да пондiс крепамны дружба. Локтiс кад юасьны и Лёвалö:

— Сержант, кунак, кывзы жö, ме сё думайта тэнчит юавны, мый понда тэныт öшöтiсö медаллез?

— Не нывкаэз любитöм понда жö.

— А тэ висьтась.

— Тэ кин? Профессор? Следователь? — сiдз жö сералiс Нурсултан, кыдз кöркö Лудов. Разамбаев дыр шы эз сет. Сыбöрын кисö сюйыштiс пиас, мымдакö сэтчин гуддисис и кыскис нöитöм, самöм армейскöй газета. Сiя сюйыштiс Лёва киэзö газета. Чуньнас тюкнитiс «Смелöй поступок» заголовок вылö, лыддьöт пö этö.

Газетаын гижöма: «Москва увтын чулöтöм ответственнöй операция понда Н-скöй полклöн командованнё сетiс куим лун шоччисьны. Мыдзöм, мисьтöм, тшыг боеццез усисö коккез вылiсь, öсилейтiс нiйö он, сэтчö бы и кунисö синнэзнысö. Окоппезын да лым вылын куйлöм бöрын чöскыта пывсисö деревенскöй баняын кыдзовöй короссезöн. Бритiсö тошшезнысö. Эта бöрын кыдз бытьтö чужисö вились, паськöтiсö пельпоннэз, лэбтiсö мороссэз, синнэз югмисö. Но... эстöн шоччисикö шогмис курьёз.

Ашынас соседньöй населённöй пунктсянь, кöда сулалiс даскык километра ылынаын ны дынсянь, эз лок продукттэзöн обоз. Полк кольччис тшыг.

Полкись командир кошшис боеццезöс, кин добровольнöя мунас разведкаö, медбы тöдны, мый лоис обозкöт. Доброволеццезöн корсисö мунны куим боец. Ны коласын старшöйöн лоис сержант Разамбаев.»

Одзлань Лудов лыддьöтiс, кыдз отсалöмась деревняись отир куим боецлö асланыс висьтасьöмöн. Отир адззылöмась, кыдз немеццез мырддьöмась обозсö и кöдöрö сiйö кыскöмась.

Деревняын чожа адззисисö додь да вöв, и боеццез гöнитiсö продукттэзöн подводаэз сьöрö. Эз ештö гöнитны час мымда, синнэз одзын мыччисис обоз. Подводаэз сулалiсö, сэтöн жö вöлiнемеццезлöн автомашина. Ны гöгöр бергалiсö и чеччалiсö, öвтiсö киэзнаныс и горöн чирзiсö немеццез. Нiя казялiсö ни миянлiсь боеццесö и мыйкö горöтлiсö нылань. «Мый керны?» — думайтiсö солдаттэз. Мигöн сувтöтiсö план. Враггез сизима, но кодöсь. Нiя — куимöн, вооруженнё — öтiк автомат и кык карабин. Только внезапность. Сöтiсö кузь шатьöн вöв кадж кузя, мымда вын лёкгоршöн рякöстiсö, лэдзисö автоматiсь кузь очередь и тöвчикöн сибöтчисö обоз дынö.

Подводаэзiсь вöввез повзисö и чепöссисö бокö, доддез пöрисö, немеццез усялiсö доддез бокö. Нурсултан горöтiс: «Хöндö хох, тойöсь завоевателлез!» Гитлеровеццез барöтöм синнэзöн видзöтiсö миян боеццез вылö и некыдз эз вежöртö, киннэз нiя и мыля тшöктöны лэбтыны киэз. Кöть ляс кодöсь, но пондiсö садясьны и вежöртны. Кутчисö винтовкаэз бердö. Но öтiк солдат, пессьöм сьöртiспортсмен, öтiк секундаöн пöрöтiс фашисттэсö коккез вывсиныс. Кольчöммесö блокируйтiсö казах да роч. Немеццезлiсь мырддисö оружие, обоз бергöтiсö. Машина вылö пуксис Нурсултан, сiя война вотöдз уджалöм шофёрöн, и иньдöтчисö полк дынö. Вайисö продуктаэз, неприятель машина вылын пизь, кöс йöв, консерваэз, вина, одеялоэз, эшö öтiкö-мöдiкö и пленнöйезöс.

Лыддьöтöм бöрын Лудов дивуйтчöмöн видзöтiс Разамбаев вылö.

— А тэ молодец, сержант. Герой!

— Кытшöм ме герой? Совсем не герой. Смертись полан — не сiйö керан. А статья умöль, öддьöн гладь, бытьтö праздник чулöтiм. Сiдз только киноын овлö...

— Эта операция понда тэныт «За отвагу» сетiсö? — юалiс Лудов.

— Не, «За боевые заслуги».

— А «За отвагу» мый понда?

— Кык танк сотi. Да тэ мый ме бердö лякасин, кыдз корось лист? — лöгöн ни горöтчис казах.

Эта коста, кöр нiя сёрнитiсö, ротаись локтiс вестовöй и висьталiс, что эм команда лöсьöтчыны марш кежö.

Луншöрнас Лудовлöн полк петiс Купянск городiсь. Öбед бöрын погоддяыс кымöртчис, бытьтö лöсьöтчис горзыны. Кок увтын шлячкöтiс лым ва. Мунны вöлiсьöкыт. Мунiсö, шоччисисö и бöра мунiсö одзлань. Солдаттэз мунiсö шытöг, видзчисисö тöдтöмö, только шоча-шоча кылiсö командаэз: «Эд кольччö!», «Эд сунасьö!», «Одзлань!», «Одзлань!».

Рытланяс сибöтчисö неыджыт населённöй пункт дынö, кöда сулалiс неылын фронт дынсянь. Этö позис вежöртны сысянь — чуть да и бöра пантасисö раненöйез, кöдна видзсисö коккез вылын.

Раненöйез юасисö, ылын ли эшö Купянскöдз. А полкись солдаттэз — кысянь пö, воноккез, туй видзатö, и кылiсö ответ: «Борисовка увтсянь». Фашисттэзлöн самолёттэз лэбалiсö сэтшöм лажмыта, что бура тыдалiсö борддэз выланыс фашистскöй свастика да лётчиккезлöн юррезныс. Солдаттэзлöн вир пизис лöгсянь. Но мый керан винтовкаöн? А нiя лэбзисö одзлань, бытьтö брезгуйтiсö миянлiсь солдаттэзöс: паныт эз лыйлö и бомбаэз эз чапкö.

Населённöй пункт дынын полк сувтiс шоччисьны. Вердiсö гречневöй кашаöн, юисö пым чай. Взводнöй проверитiс расчёттэз, личнöй состав. Полкын солдаттэз вежöртiсö, что чожа лоас наступленнё.

Украинаын ойез пемытöсь, а февраль месяцын эшö кöдзытöсь. Солдаттэз эз вермö онмöссьыны, кöть и мыдзöсь вöлiсö — кынмисö коккез. Лудов невна кежö онмöссьылiс. Нельки мыйкö вöтасис.

Асывнас, шондiпеттöдз, миномётнöй взвод и, натьтö, быдсöн полк лэбтiсö тревогаöн. Öтлаын стрелковöй батальонкöт иньдöтчисö Прокопьевка посадлань. Мунiсö вит-квать километр мымда, кыдз мышксяняс пондiс уджавны пулемёт «максим», и сылöн трассирующöй пуляэзсянь гöрд сунисöн нюжалiсö виззез. Небоын öшöтчисö югдöтан ракетаэз.

Лудов невна кежö сувтчис и осьта öмöн, дивуйтчöмöн, кыдз челядёк, дзардiс югыт чача вылö. Эта коста сы бöр кузя сiдз брынгисö, что сразу жö сапкисис кынöм вылас. Сы пеллез дынöдз локтiс лöг видчöм: «Тэ мый, баран? Если тэныт юрыт абу жаль, дак мöдiккезлiсь берегит. Герой!...» Сы бокын куйлiс Нурсултан и сё эшö сiйö видiс — велöтiс воюйтны, юр берегитны.

Пондöтчис наступленнё. Взводнöй Нагибин сетiс команда котöртны одзлань кустарниккезлань и сэтчин лöсьöтчыны бой кежö. Ештiсö сувтöтны миномёттэз боевöй положеннё вылö, сэк жö пондiс орсны артиллерия. Батальонлö вöлiсувтöтöм задача: вашöтны неприятельöс Прокопьевкаись, öтлаасьны соседньöй батальонкöт и öтлаын быдсöн полккöт босьтны бура крепитöм Борисовка. А Борисовкасянь — веськыт туй Харьковö.

«Эстöн ме первуись адззылiнеприятельöс. Немеццез веськыта, кодöсь, лёк горшöн горöтлiкö, котöртiсö миянлань», — сыбöрын касьтывлiс Лудов.

Быль, бой вöлiлöчыт. Миян пулемёттэз, миномёттэз, орудиеэзлöн шрапнельöн снаряддэз ытшкисö завоевателлезöс. Нельки командиррез, бой наблюдайтiкö, веськыта лыйисö гитлеровеццез кузя.

Лудовлöн расчёт уджалiс кыдз помеч вылын. Сiя кывзiс командаэз, сувтöтiс угломерись наводка и öтлаын Денисовкöт сюйис трубаö дополнительнöй зарядöн минаэз. Минаэз залпöн лэблiсö небоö, лэдзчисисö и трескöн потiсö му вылын. Вдруг ны дынö котöрöн сибöтчис командир, сылöн серöй синнэз öгралiсö лöг биöн, и матясьöмöн горöтчис: «Тэ, ядрёна вош... паршивöй наводчик, тэ кытчö лыян?! Тэ мыля он кывзы менчим командаэз?!»

Лудов повзис, нем эз вермы горöтчыны и тюкöтiс угломер вылö. Командир видзöтiс прибор вылö — быдöс сiдз. Босьтiс заряд, а сiя вöлiучöт, сiйöн минаэз эз лэбзьö цель дынöдз. Пуктiсö öтiкыс дын мöдiкö. «Вот öнiсовсем мöдiк коленкор. Сiдз уджалö, — рамöн ни баитiс командир, — бракоделлэз штампуйтöны не стандарт сьöртiбоевöй продукттэз». Сыбöрын казялiс быкышшöм Дунаевöс и сöтiс нöш кодь кинас сы кадж кузя: «Тэ мый кошшан кочка увтсись, вояка?» Боец повзис, юрсö кыскис кочка увтiсь да баралöм синнэзöн видзöтiс командир вылö.

— Ёрт командир, Дунаев первöй бой чулöтö. Велöтчö, кыдз юр берегитны, медбы дыржык воюйтны, — ваксьöмöн горöтчис Денисов. Командир сьöвзис и котöртiс мöдiк расчёттэз дынö. Рытланяс бой кончитчис.

Лудов и мöдiк том солдаттэз эз повзьö первöй бойись. Нылö кажитчис, что нiя орсiсö войнаöн. Но эта вöлiтолько первöй впечатленнё. Этна чувствоэз чожа öшисö.

Сержант Разамбаев Лёваöс корис, лок пö видзöтам, мый бойись петiс, мыля пö неприятель чожа виньдiс. Сто метра мымда только и мунiсö, кыдз ны синнэз одзын мыччисис вира трагедия. Немеццез и миян солдаттэз куйлiсö рядом, то гатш, то кынöм выланыс, кин коксö лэбтöм, кин киэсö павдöтöм, синнэс осьтаöсь, бугыльтчöмöсь, бытьтö кöритöмöн дзардöны тэ вылö, и быдлаын вир, вир и вир... Сьöлöм гудыртчö. А неылын, бурьян коласын, асланым боец горзö и корö век кежö ланьтöтны, медбы не мучитчыны. Куйлiс боец, кöдалöн вир пытшкись тыдалiс только öм, бокас валяйтчис орöтöм кокыс, öтiк кинас öмас сюйис лым, мöдiкнас пыкис кишкаэсö, кöдна петiсö резьöтöм кынöмсис. Локтiсö санитаррез, но боец дугдiс ни лолавны.

Кайисö ыб вылö, кытöн вöлiглавнöй бой. Быдлаын куйлiсö миян вийöм солдаттэз. Öтiк вийöм солдат вещмешок вылiсь Рудов казялiс тöдса фамиллё. Кыскисö документтэз, быль, тöдса, земляк, öтiк училищеын велöтчисö.

Куйлiсö польдöм ни, вийöм вöввез. Сотчöмась неприятельлöн автомобиллез, а кöдна сулалiсö дзоньöсь, кузоввез вылын мешöккезын вöлiанькытш, кушман, свёкла. Тыдалö, не öддьöн жö пöта сёйисö завоевателлез. А хуторын, конюшняын, куйлiс казнитöм миян боец — спина кучиксис шуллез кульöмась.

Вот сiдз Лудов примитiс первöй боевöй крещеннё. Сiя первуись аслас синнэзöн адззылiс войналiсь чужöм. Эта лунсянь и сiя пондiс повны, пондiс берегитчыны. Нылöн командир велöтiс: «Кувны и дурак кужö, а берегитны юр — ум да сноровка колö».

Сьöрсьöн-бöрсьöн чулалöны луннэз да ойез, кöдзытöсь и шонытöсь, мичаöсь и кымöраöсь, котöртö кад. А миян солдаттэз, том и пöрись, воюйтöны, кулöны Отечество понда. А гортын маммез, инькаэз, вдоваэз, невестаэз горзöны, а войналöн оз тыдав конец.

«Господи, Аллах, Пресвятая Богородича, дыр тiэшö пондат кешитчыны миян вылын? Кывзö жö, кыдз отир тiян горзö», — сулалiс пидзöссэз вылас Нурсултан Разамбаев, корис православнöй и мусульманскöй еннэсö и видзöтiс кымöр вылö. Но не Аллах, не православнöйезлöн Ен эзö кылö.

Мöдiлунö бöра вöлiбой, öддьöн вира бой, вашöтiсö неприятельöс Борисовка городокись. Эта бöрсянь полк мунiс тылö шоччисьны да виль пополненнёла.

1943 год. Март. Татöн, Украинаын, тулыс верзьöмöн вашöтö. Луншöрнас шондiбидзульöн ни öшалö. Лым кизертчис. Кöть и сёрöн ни, пимиэз вежисö ботинкиэз да сапоггез вылö. «А миян Уралын, Коми му вылын, эшö кöдзыт да и лымьясьö, а бичира чарöм шогмас джын месяц чулалöм бöрын», — аслыс думайтiс Лудов. Лёвалö öддьöн охота вовлыны гортö, видзöтны, кыдз олöны мамыс, воннэз да сойез, посадiсь отир. Только ылiсянь-ылiсянь морт вежöртö, что сылöн чужан местаэз медгажаöсь, меддонаöсь. Му, туёккез, пуэз, нельки мыррез, гунаэз, сарайез и йöррез — этна быдсöн чужанiн тороккез бытьтö ловьяöсь, и ны дынсянь визывтö шоныт, ласковöй ру.

«Даже воробей, катша-рака миянланьын донажыкöсь, небоыс пыдынжык, и руыс сöстöмжык да чöскытжык. Может, меным сiдз кажитчö, но и мед кажитчö. Менам сьöлöмын эта касьтылöм понсянь долыт и бур, но и ладно», — этна думаэз Лудов юрö пелитчисö сiйöн, что сылöн дивизия, полк, взвод шоччисьö сьöкыт, вира бойез бöрын. Солдаттэз этö шоччисьöмсö вирöн босьтiсö. Гöгöр шы не тöв, некытöн оз лыйсьö, кыдз бытьтö абу некытшöм война. Лудов-солдат куйлö сарайын идзас вылын гатш, топыт, чöскыт обед бöрын, дзардö кымöр вылö, видзöтö, кыдз уялöны кымöр пласттэз, и думаэзлö конец абу. Сiя некöр эшö сымда эз думайт, мымда талун. Да и некöр вöлiдумайтны, юасьны ассис — мешайтiсö бойез, маршшез, обстановка.

Бур обед. Гречневöй каша, тушёнка яйöн, кофей (сiдз шуис повар), американскöй галетаэз, öтiк кылöн шуны — праздник.

Лудов куйлö гатш и юасьö ассис. Мый сэтшöм олан? Мый сэтшöм смерть? Мый дырна колö овны мортлö? Мыля кулö морт и кытчö сылöн душа воштiсьö? Мыля морт чужö «ангелöн», а быдмас — лоö «чёртöн», «зверьöн»? (Этна кыввезыс Матрен бабыслöн). Кин сiйö висьталас? Кыдз вежöртны, что мир вечнöй, абу сылöн пондöтчöм и конец? Кыдз вежöртны, что время и пространство тожö конечтöмöсь? Этна вопроссэс важын ни поздiсисö сы юрö, а Лудов некыдз эз вермы нiйö öсилейтны. Ен, шуöны, эм. А кин сiйö адззылiс? Эм пö рай и ад. А кин нiйö адззылiс? Природаöс, мортöс тожö пö керис Ен, а наука мöднёж объясняйтö. Этна вопроссэз вылö веськыта он висьтав. Но вот война... Кинлö колö сiя, кинлö колö кисьтыны вир, мыля морт вийö мортöс? Сiя, наивнöй зонка, думайтiс: неужто сюра-пеля Гитлерöс (сiдз сiйö рисуйтiсö) честнöй немеццез озö вермö чапкыны фюрерись, ежели сiя вир юис аслас народлiсь да эшö война вылö вашöтiс!

А миян товарищ Сталин... А миян первöй маршал Ворошилов... Кытöн тi? Кытöн миян самöй бур самолёттэз, самöй бур винтовкаэз? Кык год ни мунö война, а винтовкаэз не каждöй боецлö тырмöны... Советскöй властьлöн враггез эз сетö лöсьöтчыны дорйыны ассиным страна? Неужто менам тятьö да Гаврил Иванович — враггез, мешайтiсö керны медбур самолёттэз, танккез, винтовкаэз и эшö öтi-мöдi? Кытчö воштiсö тятьöс и Гаврил Ивановичöс? Мыля эзö керö не следствие, не суд? Некыдз оз позь вежöртны, кöдöр боксянь-сайсянь нiя враггез, мый нiя керисö умöльсö отирлö, страналö. Мый понда пессисö гражданскöй война вылын белогвардееццезкöт? Вопроссэз, вопроссэз, а ответ абу. Юр поттöдз думайтiс, сыбöрын сивилёнсö «тихон» — он öсилейтiс, а синнэз одзын кымöр пласттэз местö сылöн льöмпуа-кыдзза посад мыччисис. И вдруг пеллесö чанöтiс кузь-кузь говк: «Пополненнё локтiс!!! Пополнен-нё-ё-о!» — кинкö гажöн, ваксьöмöн горöтлiс. Лудов саймис. Чеччöвтiс местасис и видзöтiс сылань, кысянь кылiс горöтлöм.

Неылын, медсанбат керку дын, мыччисисö нёль морт, а ны гöгöр бергалiс ёсь ныра старшина. Лудов сибöтчис матöжык. Солдаттэз гусьöника китшкисö-ваксисö, медбы не обидитны пополненнё: «Но и пополненнё... Кык баба да корреспондент... Но и пополненнё... Эттшöм армиякöт зараз Харьковöдз махнитам». А кинкö, öддьöн ни лöг кыла, жвангис: «Солдатушки, мый рызъялат, кык баба быль пополненнё керасö. Только не тiянкöт, а офицеррез постелля вылын».

Керкуись петiс комбат. Висьталiс санинструкторрезлö: «Тi, боеццез, асланыт хозяйствоын керö порядок. И эд бöбалö, а то миян хлопеццез öддьöн боёкöсь, а татöн роддом абу, — кинлöкö комбат грозитiс чуньнас, — а тэ, ёрт корреспондент, мунан вторöй ротаö, сэтчин эм мый йылiсь гижны». Комбат и корреспондент мунiсö.

Санинструкторрез пырисö медсанбатö и сэсся пемытöдз некин сэтчинiсь эз петав.

Луннэз чулалiсö. Шоччисисö солдаттэз, шатласисö öтöр-мöдöрö ыджыт украинскöй село кузя.

Локтiс виль военнöй техника: танккез, быдкодь калибра пушкаэз, содiсö солдаттэз, локтiсö тöдтöм генераллэз, старшöй офицеррез — полковниккез, майоррез.

Боеццез öтамöд коласын баитiсö, лöсьöтсьö пö ыджыт наступленнё. И миян гвардейскöй дивизиялö лоис удж.

«Наступленнё, дак наступленнё... Харьковöдз неылын, öтiк оськöлöн чеччöвтан», — шутитiсö солдаттэз. «О, öнiмунам хохлячкаэз дынö, вон кытшöм товар тшыкö, да и горилка буль-буль керам», — сералiс гажöн первöй взводiсь солдат. Сiя жö одзлань ваксис: «Вон миян взводнöйыс син увтас кытшöм фонарь новйöтö... Тöн пö вдовушка дынö пыралöма... да, видно, пистолетас пружинаыс чегöма, вот и...» «Ха-ха-ха! Хо-хо-хо! — готсисö боеццез, — герой миян взводнöй, герой. Инькаэз дынö — медодзын, пуляэз одзын — медбöрын».

Лудовлöн мыла бырис кывзыны солдаттэзлiсь пиннез кеслöм и поннясьöм. Сiя жагöника, нёджжасьöмöн шагнялiс ыджыт село кузя. Сылö паныт катыльтчисö сьöкыт стальнöй машинаэз — танккез, кыссисö повозкаэз, солдатскöй кухня, походнöй пекарня, виль паськöма боеццез. «Да-а, мыйкö чожа лоас», — шваткöтiсö думаэз Лудов юрвемын. Сiя этна думаэзсянь эз казяв, кыдз сибöтчис керку дынö, кытöн сулалiс полковöй штаб. Керку дын сулалiс автомобиль. Сiйö грузитiсö кытшöмкö коробкаэзöн. Кузовö кайис стройнöй нывка-солдат. Сылöн чочком-веж юрсиэз пышшöмась ноёвöй зелёнöй берет увтiсь. Нывка казялiс Лудовöс и сылöн бичиррезöн югнитiсö сючача синнэзыс...

«Менам юр кузя кыдз песöн вартiсö, синнэзö бытьтö пемдiсö и мымда вын горöтi: «Горадзуль!! Марья-я-а Гавриловна-а-а!» — сыбöрын касьтывлiс Лудов. А автомобиль содтiс газ и сылöн голосыс йитсис танккез, машинаэз урöтöмкöт. Нывка мыйкö öвтiс и тожö горöтлiс, но вежöртны нем ни эз позь. Автомашина гöнитiс одзлань.

Лудов тожö котöртiс сы сьöрын и горöтлiс:

«Горадзу-у-уль, Горадзу-у-уль..! Марья-а-а!» Солдаттэз пантасисö Лудовлö и кежисö бокö. Нiя, натьтö, думайтiсö, что боецлöн мывкыдыс öшöм.

А сiя кöркö Горадзульöс кольлавны эз куж, öнiпантасьны эз вермы.

Взвод дислоцируйтчис село конецын. Неделя коста шоччисьтöн солдаттэз пывсисö баняын, шырсисö, бритчисö, шик-модерн керисö (кыдз нiя сералiсö асьныс), керисö ас гöгöраныс порядок.

Миномётнöй взводö локтiсö виль боеццез, свежöйöсь, волькытöсь, кыдз воöм помидоррез. Ны коласiсь некин эшö эз нюкайт порох дук, эз адззыв войналiсь чужöм.

Солдаттэз-ветераннэз, виль боеццез адззисö мый йылiсь баитны, висьтасьны. Пöрись солдаттэзöс интересуйтiс, кыдз олöны тылын; виль боеццезöс — кыдз воюйтсьö, кыдз Гитлер солдаттэзкöт справляйтчöны.

Эстöн усис кад и Дунаевлö мыччавны ассис кужöмсö. Вторöй взводiсь боец зэгйис аккордеонлiсь меххез и нем бытшöмика эз куж орсны. Сэк сибöтчис сы дынö нескладнöй, кузь, кыдз майöг, Дунаев, кöдалöн öтiк шапка пельыс сулалiс, а мöдыс öшалiс, и зонкаыс некыдз эз вачкись боевöй солдат вылö. Сiя полöмöн, жагöника горöтчис: «Зонка, сетлы жö, ме пешла». Аккордеонлöн хозяиныс ваксьыштiс, öтiк синсö чикыртiс и лöчыта горöтчис: «Пешлöны курöггез, а эта ак-к-ордеон. Да эшö трофейнöй. Вежöртiн, пешлiсь?» Солдаттэз пондiсö корны, медбы сiя сетiс Дунаевлö аккордеон, может пö быль сiя кужö пешлiсьны. Боец аккордеонсö сетiс. Дунаев буржыка пуксис разьсьöм телега вылö, юрсö лэбтiс, синнэсö кунис и одзлань и бöрлань пешлiс аккордеонлiсь нотнöй ряддэз. И кыдз вились чужис. Сылöн чужöмыс öзйис, лоис сэтшöм мича, бытшöм. Сы гöгöр солдаттэз чöлiсö и видзöтiсö Дунаев вылö, сы киэз вылö. И вдруг пондiсö киссьыны золотоöн, бриллианттэзöн тöдса «Дунайскöй волнаэз», «Венскöй вöрлöн сказкаэз» вальссэзлöн мелодияэз, сэсся военнöй песняэз и медбöрын быдöнныслö тöдса песня «Катюша». Дунаев дугдiс орсны. Быдлаын шы не тöв. Гöгöр сулалiсö боеццез, чуть не быдса рота. Сибöтчис Дунаев дынö взводнöй Нагибин, пуктiс кисö пельпон вылас, сыбöрын лапкöтыштiс сы спина кузя и чöлöмöн, шытöг мунiс солдаттэс кругись. Мый думайтiс командир? Натьтö, сiйö, что каждöй мортлöн эм талант кытшöмкö дело бердö. Вот мый вермö керны делосö любитöм. А Дунаев керö нелюбöй удж, öнi, кыдз и мöдiккез, вийö морттэзöс, кöть нiя и шусьöны неприятеллезöн.

Кытшöмкö солдат дзугис лöньсö, сiя корис музыкантöс орсны йöктан. Дунаев пондiс серöтны барыня. Боец чеччöвтiс местасис, пиньöвтiс шапкасö и пондiс йöктыны: бергалiс тöвчикöн, сыбöрын «в присядку», керис сэтшöм коленцеэз, бытьтö некытшöм война эз вöв. Вот и эшö öтiк талант мыччисис.

Эта жö коста кинкö горöтчис: «Воннэз, почта!» И гыж только солдат чукöрыс резсис.

Неыджыт, цыган чужöма боец кыскалiс мешöкись корреспонденция, бергöтлiс юр вевдöрас письмоэз, тшöктiс йöктыны нiйö, кинлö адресуйтöмась. Сеталiс центральнöй и армейскöй газетаэз.

Лёва Лудов тожö первöй треугольник-письмо босьтiс. Нöитчöм, самöм, мымда лун сiя котöртiс, кошшис Лудовöс, но главнöйыс сiя, локтiс адресат дынöдз. Солдат лыддьöтiс письмо и кыдз гортас вовлiс. Сы син одзын, кыдз кинолента вылын, котöртiсö посадiсь керкуэз, улицаэз, тöдса отир, Чикись ю, видззез и ыббез. И сы морос пытшкын лоис шонытжык. Мамыс сiдз жö юöртiс, что воныс и сойезыс пока здоровöсь, кыдз кужöны-вермöны, отсасьöны. Сiдзжö юöртiс, что фронт вылiсь бертiс сылöн ёрт Паша Ильиных, öддьöн ранитöм лёгкоö. Кывсис пö, что Марья Гавриловна тожö фронт вылö мунöм. Лёва кончитiс лыддьöтны письмо и сюйыштiс сiйö вещмешöкö. Кайис посöдз вылö, юр увтас сюйыштiс вещмешок и нюжöтчис, водiс гатш. Небо вöлiлöз, öтiк кымöрок эз вöв. Мартовскöй шондiёрис синнэз. «А природаын таки ыджыт, бур гармония. И олан... И олан тожö великöй дело, если сiйö правильно овны», — наивнöй солдат-философ старайтчис вежöртны, мый сiйö гöгöртiс.

А эта коста Нурсултан Разамбаев жöдзис ас местаын и лёбис: «Аллах... Господи... Мать честная... Вот эд мый шогмö. Миянкöт рядом воюйтöм, а ми нем эг тöдö сы йылiсь. Герой... Герой... 23 тойöсь завоевательöс уськöтöм. Ай да Марья, от да Марья, кытшöм тэ бытшöм! Настоящöй газель... Быль, кыдз газель, бытшöм, басöк», — тотис казах и бергöтлiс киас армейскöй газета. — Эй, кунак Лудов, на лыддьöт и велöтчы, кыдз колö воюйтны», — сiя сюйыштiс газета Лёвалö.

Лудов павдöтiс газета и сразу жö сы синнэз вылö усис фотография: чочком-веж юрсиа, сючача синнэза солдат. Лёвалöн невна кежö синнэс пемдiсö: пöртмасьö ли мый ли син одзас? Сы одзын сералiс Марья Гавриловна, «Горадзуль», «Первокласснöй снайпер», кыдз статьяыс величайтiс сiйö газетаын. Марья воюйтöм öтiк дивизияын, нельки öтiк полкын Лудовкöт. А öнiкомандованнё ыджыт подвиг понда сетöм отпуск ветлыны гортö.

«Вот эд мый вермас петны. Бöра эз шогмы Марьякöт пантасьöм. Ой, судьба-индейка, мый жö издевайтчан морт вылын», — гусьöн аслыс шушкис, кыдз молитва лыддьöтiс, Лудов.

Нурсултан казялiс, кыдз сылöн ёртыс кымöртчис, вежсис чужöм вылас и, кыдз садьтöм, тотьö ныр увтас, сибöтчис сы дынö и издевайтчöмöн горöтчис: «Тэ мый, пермяк-кунак, нывкаэзöс эн адззыв?» Только сёрöнжык Лёва висьтасис Нурсултанлö, кин сiя «первокласснöй снайпер» Марья Гавриловнаыс, да сiйö, что некыдз оз вермы пантавны.

Нурсултан, ёртыс висьтасьöм бöрын, нарошно ли, часто эз позь вежöртны сiйö, сувтiс пидзöссэз вылас, синнэсö сувтöтiс кымöр вылö, киэзнас малалiс чужöмсö и кеймис: «Господи, Иисус Христос, дона Аллах, мича Магомет, и тэ, Будда, сетö зонкалö тырдоз счастье, сетö, сетö... А од кывзö, некöр ог понды кеймисьны. Кывзы, кунак, эн тöждiсь, ежели юртö он öшты война вылын, счастье эшö лоас.» А сыбöрын Нурсултан ас йывсис висьтасис, что сылöн тожö вöлiневеста, Зульфияöн шуисö. «Ох, кытшöм басöк да бытшöм вöлi: синнэзыс — сьöд дзуллез, вöснитик, веськыт, кыдз камыш, юрсиыс — вöв бурси, öтiк кылöн шуны — газель... А тэ, зонка, адззылiн газельсö? Эн. Умöль, медбы вежöртны, колö синнэзöн адззывны. А кыдз йöктö... Каждöй мускул орсö, юсьöн лэбзьö. Стрась ми любитiм öтамöднымöс. Но эз ло миян счастье. Бергöтчис миян дынсянь Аллах. Айöлöн учöт вöлiхозяйство, калым эг вермö вештыны. Зульфияöс сетiсö мöдiк сайö. Пöрись, богатöй казах сайö. Сiя нывкаыс понда быдса вöв табун сетiс. Тiян счастье — Россияын абу сэтшöм дикöй традиция», — гажтöма кончитiс ассис баснисö Нурсултан.

Лудовлöн дикöй традиция вылö лöгсянь моросас пизис вир. Сiя, кыдз цеппезiсь мезмöм, пондiс горöтлыны:

— Дак тэ мый гарддян, 25 год ни Советскöй властьлö, а тiян сё эшö важ пережитоккез. Тi, том отир, мый видзöтат?! Этнö пережитоккесö калитöм кöртöн колö сотны, а тi... тi...

— Мый ми... О, зонка, российскöй зонка... Пережитоккес нiя дыр эшö оз кулö. Кад колö. Тэ вежöртан, миян сё эшö нывкаэзöс гусялöны и некытшöм закон оз уджав, — паныт видзис ответ Нурсултан.

Нiя эшö дыр баитiсö, висьтасисö öтамöдныслö. Лёва висьтасис, кыдз олöны коми-пермяккез, кытшöмöсь нылöн традицияэз, кытшöм енлö веритöны, песняэз сьылöны и уна öтiк-мöдiк йылiсь, а ачыс тожö буржыка пондiс вежöртны Нурсултан Разамбаевöс, казаххезлiсь олöм, нылiсь традицияэз.

Эта коста пеллезöдз локтiс чорыт команда: «Баста!!! Отпуск кончитчис. Воннэз, славянаэз и неславянаэз, трубаэз — пельпон вылö, лафеттэз — горб вылö, минаэз — додь вылö и марш Берлинöдз!» Этö шыннялöмöн командуйтiс взводнöй. Миномётчиккез дивуйтчöмöн видзöтiсö асланыс взводнöй вылö. Сiя нач мöдкодьсялöма, бытьтö быдмöма, ыджытжык лоöма. Сы вылын вöлiвиль шинель, дзуртiсö ременнез, свиттялiсö сапоггез, бокас öшалiс виль кобураын пистолет, даже эз веритсьы, но юр вылас шапка пукалiс устав сьöртi. Пельпоннэз вылас виль погоннэз и уже не младшöй лейтенант, а настоящöй лейтенант.

— Ёрт лейтенант, а ме неславянин, а мусульманин, ме кытчö муна? — риз видзис-сералiс Разамбаев.

— Сэтчин жö, сэтчин жö, кöть Турция пыр, — гажöн чеканитiс взводнöй.

Солдаттэз кыдз бытьтö первуись адззылiсö ассиныс командирсö: чужöм вылас волькыт, синнэзыс орсöны гажöн, стройнöй. «Герой, нем он шу, сэтшöм командиркöт и кувны кокнитжык, — быздылясьöмöн ошкис взводнöйöс Нурсултан, — а то нятьöсь тоша, тьфу!» Нурсултан эшö мыйкö мöдiс горöтчыны, но син вылас усис командирлöн строгöй чужöм и бытьтö виньдiс.

А чожа локтiс виль юöр: взводнöйсö пö назначитöмась командирöн стрелковöй ротаö. Этö юöрсö взводiсь солдаттэз эзö примитö радöн. Нiя сы дынö велалiсö ни, вежöртiсö сiйö. Кин, кытшöм бöра лоас виль взводнöй?

Куим час бöртiминомётнöй взвод öтлаын стрелковöй полккöт колис шоныт, ласковöй украинскöй село. Солдаттэз шагнялiсö сё одзлань и одзлань. Каждöй солдатскöй шаг — этö Родиналöн победа торок.

Лун бöртi, рытнас ни, миномётнöй взвод сувтiс боевöй порядокö ыджыт Ветровка село дынын. Боеццез телегаэз вылiсь тэрмасьöмöн ваялiсö расчёттэз дынö минаэз, тэрмасисö заптыны боеприпассэз. Солдаттэз озö тöдö командованнёлiсь стратегическöй планнэз, но вежöртiсö, что лöсьöтöм ыджыт наступленнё: танккез, орудиеэз, мöдiк боевöй техника, личнöй состав сё унажык и унажык чукöртчисö село гöгöр. Боеццез ойбыт эзö куньö синнэз, лöсьöтчисö бой кежö. Кытöнкö ылын гымалiс артиллерия. Ваксисö пулемёттэз, сяргисö автоматтэз. Юр вевдöрын урöтiсö самолёттэз и чапкалiсö югдöтан ракетаэз. Кысянькö небосö малалiсö прожекторрез. Быд боец сьöлöмын поздiсис личкан тревога, и быдыс, натьтö, думайтiс, мый ашын лоас.

Виль взводнöй öтлаын политруккöт проверяйтiсö быд миномётнöй расчёт, лыддисö боеприпассэз и мунiсö батальон команднöй пунктö. Боеццез лöньсисö. Петiс он. Но некин эз узь. Быд солдат кылiс, кыдз сылöн моросын токöтiс сьöлöм, бытьтö кад лыддис, кöсичаын шваткöтiс пульс.

Асывсяняс пондiс мичамны. Эта коста öтöр-мöдöрсянь лэбзисö кымöрö зелёнöй ракетаэз, и чожа пондiс гымавны разнöй калибра артиллерия, артснаряддэз поткöтiсö асывся воздух, нырьялiсö, резiсö му. Тыдалiс, Ветровкаын пондöтчисö пожаррез. Артиллерия канонада бöрсянь сьöрсьöн-бöрсьöн лязгöтiсö гусеницаэзнаныс танккез. Ны мышкын, кыдз кöдзыв, котöртiсö автоматчиккез, ны сьöрын — винтовкаэзöн «ыббезлöн царица» — матушка-пехота.

Миномётнöй взводлö сетiсö направленнё швыргайтны противопехотнöй минаэз. Пондöтчис наступленнё. Медматiсь задача стрелковöй батальонлö, кöдылö подчиняйтчис и миномётнöй взвод, вашöтны Ветровкаись неприятельöс и петны тракт вылö, кöда йитiс Харьковкöт.

Неприятель тожö абу узьöм. Бура лöсьöтчöм оборона кежö. Село гöгöр гарйöм не öтiк линия окоппез. Час бöртiмиян наступленнё виньдiс. Неприятель кинжальнöй биöн палитiс миянлiсь ряддэз. Пехота водiс. Сотчисö миян танккез. Вöлiсö первöй раненöйез. Санитаррез передовöй вылын керисö ассиныс удж.

Миномётнöй взводлöн боеприпассэз тожö кольччисö етша. Эта коста жö, кыдз кайварыш табун, уськöтчисö ны расположеннё вылö самолёттэз. Нiя сьöрсьöн-бöрсьöн пикируйтiсö солдат юррез вылö и, кыдз картошка бочкаись, кисьтiсö бомбаэз. Нiя нёштöма шовкöтiсö-потiсö, резiсö осколоккез — кöдзисö смерть.

Кöр неприятельлöн самолёттэз саясисö и лöсьöтчисö мöдöтпыр пырны взвод распоряженнё весьтö, миномётнöй взвод ештiс вежны позиция. Сiя жö кадö мыччисисö миян тупика ныра истребителллез, и неприятельлöн самолёттэз пышшисö.

Командованнё взводлö сетiс приказ — материальнöй частьсö кольны боепитаннёлöн начальниклö, личнöй составлö мунны передовöй вылö. Взводiсь солдаттэз, кин винтовкаöн, кин карабинöн, а кин и автоматöн, кытшöмкö тöдтöм лейтенант командованнё увтын мунiсö передовöй вылö.

Бöра пондiс гымавны артиллерия, кытöнкö бокын жольöтiсö танккез. «Енлö слава», — сiдз шуисö солдаттэз, кöр мыччисисö пикируйтiсь бомбардировщиккез. Пондöтчис виль наступленнё.

Лудов взводлö сувтöтiсö задача: öтлаын стрелковöй ротакöт петны ложбинаись и шульга флангсянь босьтны неприятельлiсь медматiсь рубеж и сэтчин крепитчыны. «Кытшöм кокнита кыв вылын шогмö приказ, а кыдз сiйö тыртнытö — эта уже мöдiк дело, мöдiк коленкор», — бой йылiсь казьмöтiс Лудов.

Лейтенант командуйтiс: «Боеццез, одзлань, одзлань, неыджыт пробежкаэзöн! Эдö кольччö, одзлань! Тэ, балда,мать твою душу(этö Дунаевлö), мый ракаэз лыддян? А тэнö мый, столбняк кутiс (этö Лудовлö), вод, мать...».

Денисов котöртiс Лудов бокын, ордчöн — Разамбаев. Денисовлöн сьöкыт, вына телоыс то водiс, то лэбтiсис.

— Денисов, берегитчы, пулемёт миян кузя шпаритö! — эз ешты горöтчыны Лудов, курганскöй мужик кыдз нюдз ув чегис, кусiньтчис и пондiс бергавны ас местас. Чужöмыс бледöтiс, синнэсö бугыльтiс и пондiс котöртны неприятель пуляэз вылö. Сыбöрын лэбтiс юр вевдöрас винтовкасö, бытьтö кинлöкö мöдiс сöтны, сэсся лэбтiс коксö, öвтыштiс шупыта кинас и усис гатш. Кöр Лудов сы дынö сибöтчис, адззис сылiсь не öтiк очередьöн пышналöм мороссö и кынöмсö. «Ох, Денисов, Денисов, нянь быдтiсь, он ни тэ лэбты виль керку, он ни тэ быдты зонтö, богатöй урожайез», — жалейтiс Лудов мужиксö. Не весь гижис немецкöй солдат аслас письмоын роч солдаттэз йылiсь: «Русскöйез, кöть и вийöмöсь ни, озö усьö, котöртöны, наступайтöны...».

Командир жалейтiс солдаттэзöс. Пуляэз увтö весь нiйö эз иньды. Но взвод синнэз одзын сё чинiс и чинiс. Лудов одзын Дунаев керис кытшöмкö йöктан движеннё, сыбöрын веськöтчис, бергöтчис Лёвалань и сапкисис гатш спина вылас. Гырдззаэз вылас нырыштсис, лэбтiс пуляöн пырöтöм юрсö, нёджжöвтiс неадззан синнэзнас порох тшына небо вылö и век кежö кусiс.

Война, война, мый тэ керан отиркöт? Видзöт, бöра ньылыштiн мортöс, натьтö, эта зонкаись петiс бы талантливöй музыкант.

Взвод эз ешты сибöтчыны гитлеровскöй медодзза эшелон дынöдз, фашисттэз осьтiсö кинжальнöй би. Пуляэз вижгöмöн, нёштöма шутнялöмöн лэбзисö одзаныс и бöраныс, боканыс и юр вевдöраныс. Лудов бокын дзебсисис-куйлiс Нурсултан, и Лёва сразу эз казяв, кыдз ёртыс пондöм киас гранатаöн кыссьыны неприятельлань.

— Сержант, тэ кытчö? Бергöтчы бöр... Вия! — горöтлiс командир. Перво, натьтö, сiя думайтiс, что сержант мöдö сетчыны пленö, но вежöртiс, что боец сибöтчö вражескöй пулемёт дынö. Солдаттэз кулöм не ловьяöсь видзöтiсö Нурсултан сьöрын. Кöр отчаяннöй казах матö ни сибöтчис пулемёт дынöдз, сы одзын потiс кытшöмкö боевöй снаряд. Пулемёт виньдiс. Фашисттэз чöлiсö. Этö враггезлiсь чöлöмсö используйтiсö солдаттэз. Нiя котöртiсö неприятель оборона линия вылö. Казах куйлiс кынöм вылас. Боеццез бергöтiсö сiйö спина вылö — лолалö, а сознаннё абу. Некытiсь оз пет вир. Киэз, коккез местаын, быдлаын дзонь. Локтiсö санитаррез и плащ-палатка вылын кыскисö сiйö тылö. А взвод наступайтiс. Веськыт фланг вылын — мöдiк рота, шульга вылын — куимöт, одзаныс — первöй. Ранитiсö лейтенантöс, но сiя одзлань нуöтiс боеццезöс цель вылö.

Лудов котöртiс командир бокын и старайтчис не кольччыны сы сьöрись. Неприятельлöн медодзза оборонительнöй рубеж дынöдз вöлiнеылын ни. Миян миномёттэз пондiсö утюжитны гитлеровеццезлiсь окоппез. Лёва керис кынымкö оськöв — и сэтöн кыдз оглобляöн сöтiсö кок кузя, и сiя турьялöмöн усис ныр вылас. Бергöтчис спина вылас. Мöдiс чеччыны, синнэз одзас шогмисö веж круггез» и бöр пöрис гатш. Лудов дынö сибöтчис тöдтöм боец, лэдзис сылiсь вешьян, и ачыс Лёва адззис лядьвей вевдöрас куим осьта («очередь», — висьталiс аслыс), а лядьвей мышкас — виртöм эшö, орöтöм, косялöм яй («разрывнöй пуля», — отметитiс Лудов). Боец бинтуйтiс сылiсь рана, пелитiс сы юрö (валяйтчис му вылын) каска и горöтчис: «Ловьяöсь лоам, адззисьлам». Лёва, мымда вöлiвын, лэбтiсьыштiс да юалiс боецлiсь, кыдз сiйö шуöны. Боец бергöтчис, невна кежö сувтыштiс и горöтчис: «Земляк тэнат. Ильинскийись. Егор Чиртков. Адззисьлытöдз!»

Лёва куйлiс гатш, öнiсылö некытшöм эз вöв зубыт, нем эз вись. Только юрыс вöлiсьöкыт-сьöкыт. Сiя, мымда вын, лэбтiс юрсö, телосö и пондiс кынöм вылас гужгыны логланьö. Мешайтiс карабин, сiя зубыта вартiс кок кузяс, кöр веклясис боец. Но вот и ложбинка. Боец бöра водiс спина вылас, видзöтiс кымöр вылö и адззис, кыдз порох тшына кымöроккез жагöника уйисö мышкланяс. Юр сылöн эз вермы думайтны, сiдз и куйлiс, думайттöг.

Вдруг пеллез, кыдз бур локаторрез, кутiсö лыйсьöм, танккезлiсь жольгöтöм и нето сьылöм, нето горзöм: «Уа-а-а, у-а-а-а... ура-а, ура-а!» Лёвалöн юр вöлись вежöртiс — батальон босьтiс Ветровка. Эта коста кысянькö лэбзис, кыдз балямош, свинецись ли, стались ли смерть, «дзин-н-н» и шваткис Лудов юр кузя. «Юр пытшкам пым-пым лоис, синнэз одзын кымöрыс пиньöвтчис, резсисö öтмöдöрö югыт бичиррез, телоö лоис кокнит-кокнит, и пондiкытчöкö вöйны. Но эшö, видно, вöлiсознаннё — аслым баитi: вот, шуа, локтiс смерть, кытчö öнiуя, райö или адö, и эстöн нач пемдiс», ― сiдз ачыс висьтасис Лудов, кöр сiйö вöтiс смертьлöн эшö öтiк сой.

Пондiс котöртны Украина степпез, ыббез, вöррез, городдэз, и селоэз кузя верзьöмöн боёк апрель. Тулыс. Быдлаын ни звонитö мича тулыс. Пондiс ловзьыны му, потны сякöй турун-цветлöн кöдзыс, быдмассэз пышналiсö шоналöм му и кыссисö шондiдынö. Бадь, ловпуэз вылын, яблоня, вишня, груша да величавöй каштан пуэз вылын пондiсö потны почкаэз. А сирень шондiморос вылын веськöтiс листтэз. А войналöн конец абу. Дыр эшö инькаэз, маммез, невестаэз босьтасö похоронкаэз, уна эшö нылöн киссяс синва.

Керку. Война вотöдз вöлöм начальнöй школа. Джоджын, идзас вылын, куйлöны ранитöм боеццез.

Лудов садясис. Сiя адззис югыт öшыннэз, шондiюгöрлiсь орсöм, отирöс чочком халаттэзын.

«Пондылiлэбтыны юрöс, эг вермы. Öддьöн сьöкыт, уна-уна кöрттуввез вартöмась, пеллезын шум — пожумаин вöр. Шульга кокö тувдöм, кок чуннез оз кöстiсьö. Кылiукраиночкаэзлiсь сьылана кыввез: «Отчинiдвери, отчинiдвери, хлопцам холодно». Вежöртi, что ме раненöй. Сэсся бöра юрам пым-пым лоис, синнэз одзын лэдзчисис сук туман, садьö öшис. Мыччисис тятьö: «Вот тэ кытöн, Левко, а ме тэнö быдлаись кошша... Ашын Кульюраö мунам ош вийны. Чеччы, кага, тырмас узьны, кадыс школаö ни мунны... Лёвка, зонöй, некинлö эн верит, ме не враг...» Эна кыввез бöрсянь йиджис сук туманыс». — Этадз касьтывлiс Лудов ассис садьтöмсявлöмсö.

Лудов бöра садясис. Адззö — öт бокас и мöд бокас куйлöны, ойзöны ранитöм боеццез. Том украиночкаэз öтöр-мöдöрö котрасьöны, то öтiк раненöй дынö, то мöдiк раненöй дынö локтасö, сёйны ваясö, ваöн юкталасö, бинттэз рана вылiсь лöсьöтасö. А öшыннэз пыр апрельскöй шондiкозьналiс ассис золото. Öтöрын чирзiсö воробейез. Лёва дын локтiс нылочка и киас видзис пым пöжалöм картошкаэз, сiя небыта малыштiс Лудовлiсь юрсö и ласковöя горöтчис, бытьтö сьылiс: «Хлопец, сёй пым бульбасö, сёй. Вит лун ни эд он сёй». Лудов мöдiс вöлiблагодаритны нывкаöс, но эз вермы горöтчыны öтiк кыв. Юрсö бы лэбтiс, мöдiс нюжöтны кисö пым картошкала, но юрыс бытьтö мездiс, и бöра лэдзчисис сук туман. Недыр мыйись бöра садясис. Перво-наперво сылöн пеллез пондiсö кывны шыэз: ыбöссэзлiсь дзуртöм, жольгöтöм, машинаэзлiсь урöтöм, морт голоссэз. Сы одзын, кыдз одзжык, оссис быдса мир.

Сы пеллезöдз локтiс настойчивöй тöдса голос: «Сестра, сестра, ме чожа, ме только öтпыр дзар кера сы вылö. Друг сiя менам». А сылö отвечайтiсö паныт: «Сiя эшö садьтöм. Витöт лун ни садьтöм, витöт лун ни оз сёй. Ыджыт, сьöкыт операция вöлi. Сэтöн жö эшö контузия — нем оз кыв. Локтас самолёт — тыловöй госпитальö нöбöтам». «Ме только дзар керышта, дзар керышта...» — тотис тöдса голоса морт, но Лудов эз вежöрт, кин сiя.

Нурсултан сибöтчис Лёва дынö, югнитiс öгыра шом кодь синнэзнас, серöмтчис öмтырья чочком пиннезнас, и другыс чужöм весьтö öшöтiс сьöд чери — налим. «Боеццезсянь козин, сёй да веськав», — гажöна горöтчис Нурсултан. Лудов видзöтiс, видзöтiс сы вылö, старайтчис вежöртны, кин сiя. И вежöртiс. Сiя гусьöна нюжöтiс: «Нур-сул-тан... Тэнö жö вийисö...» Нурсултан горöтчис, видзöт пö, ме не енлö, не чёртлö ог ков. Менам только учитик контузия вöлi.

«Господи... господи, ловзис, хлопец ловзис», — радöн шыасис медсестра. А Лёвалö лоис долыт, гажа и, мымда вын вöлi, горöтiс: «Марья Гавриловна! Горадзуль! Ме ловья, ме ловья, ме сэсся некöр ог кув! Тэ адззан, лöз син, ме ловья-а-а!» Но этнö шыэсö некин эз кыв, сылöн только тырппес вöрисö и öмсис петiс сук дуль. Сiя вились пондöтчис аслыс баитны.

Неделя бöртiЛудовлö лоис долытжык. Полевöй госпиталь видзчисис самолёт, ыстыны öддьöн дойдöм боеццезöс тыловöй госпитальö. Но военнöй обстановка дзугис госпитались планнэз. Ыстiсö раненöйезöс автомашинаэзöн Купянскöдз.

Одзланьын Лудовлöн вöлiсö госпиталлез, операцияэз, мукаэз и леченнё. И локтiс кад, кöр Лудов костыллезöн, инвалид, бертiс гортас.

Пондöтчис мöдiк олан.